Wednesday, December 31, 2014

ALL EYES ON THE BRIDE & GROOM: DONGYAN WEDDING

Ikinasal na sila-- sina Dingdong Dantes at Marian Rivera.
Marangya ang okasyon na dinaluhan ng mga personalidad mula sa mundo ng showbiz at public service. Larawan daw ng tunay na pagmamahalan ayon sa mga tagahanga. Mala-fairy tale na kuwento para sa media.

May naaliw man, mayroon ding naasiwa o nasuya.


Screenshot: Instagram account of Dingdong Dantes


Ang ilang netizen, pinagkatuwaan ang "big news" na iyan kahapon mula sa mga witty at sarkastikong komento hanggang sa paggawa ng nakatatawang internet meme. 



Isa sa mga kumalat na internet meme kasunod ng marangyang kasalan nina Dingdong Dantes at Marian Rivera. Source: Anonymous 


Thoughtless extravagance, hirit ng iba... para sa isang bansang mahirap gaya ng Pilipinas.

Tinalakay ito sa blog na getrealphilippines.com 
Tinukoy roon ang posibleng paglabag umano nina DongYan sa isang batas na nagbabawal sa anila'y thoughtless extravagance.

Alinsunod sa Article 25, Chapter 2 ng Philippine Civil Code...
Art. 25. Thoughtless extravagance in expenses for pleasure or display during a period of acute public want or emergency may be stopped by order of the courts at the instance of any government or private charitable institutions.

Nalabag nga ba ito ng DongYan Wedding o tinagurian ding "Kapuso Royal Wedding?"

Months or weeks naging bukambibig ang paghahanda sa kasal, walang naka-sense na maluho o "hindi magandang ehemplo" sa ordinaryong mamamayan-- walang nagtangkang pumigil. Wala mula sa media, NGO, gobyerno at maski sa isang pribadong grupo.

May pumigil ba na ipalabas dito sa bansa ang totoong Royal Wedding sa U.K. (Prince William & Princess Kate) ? Hindi ba't kahunghangan din ang kaaliwan iyon gayong wala namang hari at reyna sa Pilipinas? 

May pumigil ba sa pagpapalabas ng boxing match ni Manny Pacquiao at Timothy Bradley habang nananalanta ang flashflood sa Sarangani noong June 2012?

Labas sa usapan ng thoughtless extravagance...
eh, marami nga sa atin ay makailang-beses naaliw at namangha sa maluluhong wedding proposal at pre-nup videos?! Ano pa kaya sa isang kasalang sa mismong bakuran natin masasaksihan? kung saan tutungo ang groom sa simbahan sakay ng mamahaling motorsiklo? kung saan nakabihis ang bride ng P2M-worth na gown? kung saan ang bride at groom ay parang santo na babasbasan dahil sa dami ng pari at obispo na mangangasiwa sa sakramento? kung saan ang ninong mo sa kasal ay presidente ng bansa habang kilalang personalidad sa iba't ibang larangan ang iba pa at mga bisita?

Ang ilan namang Pinoy, kayang ipasara ang maraming eskinita sa kanilang barangay para sa sariling kasal kahit nga debut ng kanilang anak na nagdadalaga. Ubos-biyaya nga ang iba. Uutang pa at handang magluwal ng malaking halaga. Katuwiran natin, minsan lang naman itong mangyari, alang-alang sa pamilya. Kinabukasan, makikitang nagdidildil na ng asin ang mag-anak matapos ang enggrande nilang handaan. Sa kabila niyan, bihira ang may nagsisisi.

Tama na ang pagiging ipokrito.
Ang DongYan Wedding ay isa lang ordinaryong palabas sa TV na minsanang nagpakita sa atin ng karangyaan sa buhay... na nagbigay para sa iba ng kaunti o pansamantalang determinasyon o inspirasyon upang magsikap sa buhay.

Puwede rin namang kabaligtaran ito para sa ilan. Maaaring nagtanim pa ito sa kanila ng inggit at pagkaawa sa sarili.

Alin ka sa dalawa?
Maaliw at ma-inspire o mamatay sa inggit? 

Syempre, may exemption. Matapos manalasa ang Bagyong Yolanda at tumambad ang malawak nitong pinsala, marami sa atin ang mabilis na nagbigay-simpatiya. Ang mga kasado nang Christmas party ay kinansela. Ang iba, inilaan ang pondo para makabahagi sa relief operations.

Nasa kalagitnaan pa lang ng pananalasa ng Bagyong Seniang nang ikasal sina Dingdong at Marian. Huwag natin silang husgahan na manhid sa mga naghihirap sa kasalukuyan. 

Maski pa magkusa ang DongYan na magsagawa ng relief operations sa simbahan, hindi naman matatapos doon ang problema sa kahirapan.

Tapos na ang DongYan Wedding. Back to work na tayo.

Tuesday, December 2, 2014

REVIEW: THE HALF SISTERS

Masasabing nasa Book 2 na ang GMA afternoon teledrama na The Half Sisters. 

Last June nagsimula ang nabanggit na palabas na pinagbibidahan ng dalawang teen stars- Barbie Forteza at Thea Tolentino. Umiikot ang istorya sa magkapatid na Diana (Barbie) at Ashley (Thea) na nadiskubreng magkaiba ang kanilang ama kahit sila ay kambal.

Ang kaso ng magkapatid ay tinatawag na heteropaternal superfecundation - isang bihirang kondisyon ng pagka-fertilized sa egg ng babae ng sperm mula sa dalawang magkaibang lalaki. Ang ama ni Ashley ay ang "tunay" na mister ni Rina (played by Jean Garcia) na si Alfred (Ryan Eigenmann) habang si Benjie (Jomari Yllana) ang ama ni Diana. Ginahasa kasi ni Benjie noon si Rina. Dati silang magkasintahan.

Ang kondisyon nina Diana at Ashley ang mistulang mitsa sa masalimuot na relasyon nina Rina at Alfred.
Ito rin ang masasabing dahilan ng hindi magandang relasyon ng mismong magkapatid. Lalo pa itong nagsanga-sanga sa pagku-krus ng landas ni Rina at ni Benjie na nakalaya na mula sa pagkakulong dahil sa panggagahasa sa una.

Ang tunggalian ng dalawang ama ay nauwi sa pagkagahaman ni Alfred...sa pagtuturo sa kanyang anak na si Ashley na maging makasarili at ilagay ang kanilang mga sarili sa di-makatwiran at di-makataong pagtrato kina Rina at Diana.

Ang claim ng GMA, number 1 sa afternoon TV ratings ang The Half SistersSabagay, makailang-beses naman ding sinasang-ayunan ng daily ratings na inilalabas ng Kantar, ang ratings service provider ng ABS-CBN. 

Nahahalintulad ko tuloy ang THS sa potensyal nitong maging popular gaya ng original Mara Clara na pinagbidahan nina Judy Ann Santos at Gladys Reyes.

Kaunting push pa siguro at puwede na ring isugal ng GMA ang THS na ilipat ang timeslot nito sa primetime na siyang ginawa noon ng ABS sa Mara Clara bilang tangkang pagpapataob sa Marimar/Thalia mania ng RPN-9.

Kung anuman ang nagpapahatak sa maraming viewers ang teledramang ito ay typical formula - dating api na ngayo'y lumalaban; catfight; pangangaliwa ni mister; paghihiganti ni legal wife at love triangle. In-acknowledge natin ang ilang twists sa istorya. Hindi naman aabot sa Book 2 ang THS kung napabayaan ito.

Screenshot from www.gmanetwork.com


Puna ko lang ang ilang 'sabit' sa production gaya ng malimit na pag-blur sa set gaya ng poster sa canteen, plaka ng sasakyan at product brands. Sino ba ang toka sa set design para maiwasan agad ang dapat iniiwasang brand? Kung nagkagipitan na, wala bang safe shots na kayang gawin ang director? Maiintindihan ko kung news program iyan pero sa isang TV drama - parang big turn off ang blur.

Ilang bahagi rin ng scripts ang palyado-- nakakabobo minsan. Naalala ko yung eksenang nahimatay si Diana sa loob ng isang subdivision area. Sa elevated at puno ng Bermuda grass natumba ang dalagita. 

Napadaan sa lugar ang sasakyang naroon si Rina. Bumaba siya para masilip at sana'y matulungan ang di nakikilalang anak niya pala. Nang lalapit na si Rina, wow... biglang sulpot (nanakbo) ang may apat na tao (isang ale at tatlong binatilyo) at diretso silang lapit at pumalibot kay Diana?!? 

Patok sa maraming viewers ang catfight nina Diana at Ashley. Makailang-beses itong nasasaksihan sa loob ng eskwelahan pero bakit wala man lang kahit konting eksena ang mga guwardiya?!

One time, nakapunta rin sa school lobby si Rina kasama ni Diana para suyuin si Ashley na magkasundo na ito at ang kanilang ina. Nagkaroon ng komosyon... pero wala ni isang guwardiya o teacher na sumuway.

Late naman ang responde nila sa isang maliit na sunog sa loob ng canteen. Nakapagtatakang late na nga, ang tanging ginawa ng mga guwardiya ay huwag magpapasok ng mga usisero. Take note, walang naiwang sinumang nakatatanda o guwardiya o maski head kusinero sa canteen para kahit paano ay apulain ang apoy sa pamamagitan man lang ng fire extinguisher.

I also remember what Audrey and Ailyne told me na ang bulag na si Rina-- in fairness, madalas ay maayos ang makeup lalo sa kanyang mga mata. "Buti, may time pa siyang magpaganda nang husto ah?" Hindi rin nakaligtas ang eksenang nasugatan si Rina sa nabasag na pinggan. Kasabay kasi ng pagsambit niya ng linya ay animo'y pag-muwestra niya sa bahagi ng kanyang kamay na nasugatan... na base sa impresyon ng kasamahan kong nakapanood ay parang alam na ni Rina kung nasaan eksakto ang natamong sugat.

Hindi na siguro ako magtataka kung nao-overlook ng writers ng THS ang ilang elements na para sa ilang viewers ay hindi raw kapani-paniwala o kaya'y nakakabobo. Kinukulang ba sila sa oras sa pagbuo ng mga susunod na eksena o pagdo-double check sa mga script? 

Sumatutal, hindi maikakaila, pinapanood pa rin namin ang teledramang ito for entertainment... pero sana, hindi lang dahil may nakikita kaming weirdo o maling execution sa eksena.